نصائح هامة للمزارعين في النصف الثاني من ديسمبر.. تعرفوا عليها

أعزائي المزارعين .... انتبهو قوي !!

الشتاء داخل "هاجم".

النصف الثاني من ديسمبر (يعني من يوم 15 وحتي اخر شهر 12) ... فيه حاجات كتير مهمة واحتياطات لازمة لزرعتك ...

زي ما هو باين فى المنحنى اللى مرفق ده اللى هو شكل الجو (الطقس) من انهاردة وحتى آخر شهر ديسمبر (12) وده طقس وسط الدلتا يعني الاطراف هتكون اكبر من كده ... المهم.. اللى يهم النبات والزراعة هو "درجة الحرارة الدنيا" ...اللى باللون الازرق فى الصورة .

وواضح إن الحرارة هتنزل قوي من يوم 17 ديسمبر وهتستمر فترة كده ... يعني درجة الحرارة الدنيا هتنزل حتي 7 وكمان 6 وفي بعض المناطق 5 درجة مئوي وهتستمر فترة على كده ...

وسبق شرحت ليكم الحرارة الدنيا لما تنخفض بتعمل ايه فى النبات الموجود ... هعيده تانى اخر المنشور ...

^^^ طيب نعمل ايه؟

** البطاطس الصيفي اللى هتتزرع:

أولاً: منزرعشي في 11 و12 ديسمبر وكمان عن 17 لغاية 19 ديسمبر لان درجة حرارة التربة هتكون منخفضة جداً وهتأخر الانبات.

ثانياً: لازم تتعامل التقاوي بمنشطات الانبات زي الهيومك والفوليك وحاجات تانية (بقول لازم) ..

ثالثاً: قبل الزراعة بيوم لازم اضيف (تانى) 2 شيكارة سوبر فوسفات محبب على الخطوط للفدان (بصرف النظر انت رميت اد ايه مع التجهيز) وبقول تانى "لازم".

رابعاً: مع الرية الأولى (لسه بعد من 25-30 يوم من الزراعة) هنضيف 5-7 لتر حامض فسفوريك 80% حقناً مع الري بالغمر و 3-4 لتر للتنقيط.

تابعو معاي ايه المفروض يتعمل مع باقي المحاصيل المنزرعة أواللى هتتزرع ....

 

================

وده اللى بيحصل للنبات لما الجو بيبرد قوي: اقرءوه

** توقف تقريباً حركة السيتوبلازم في الخلايا كما فى الشعيرات الجذرية فى حرارة تربة اقل من 10-12 ◦م) ... ومن اعراضه ضعف وتقزم "شديد" فى النمو (خيار وطماطم وخاصة فى الاعمار الاولى).

** احيانا ظهور البلزمة "الكاذبة" في بعض الخلايا بسبب الزيادة المفاجئة فى نفاذية الاغشية وتسرب المواد المذابة من الخلايا ... ضعف ونقص في معدلات الصب والتحجيم فى المحاصيل الارضية بالتحديد (البطاطس – بنجر).

** المجاعة الداخلية وذلك بسبب زيادة معدل التنفس على حساب معدل البناء الضوئي مما يؤدي الى حدوث نقص التغذية... ويبدأ النبات يسحب العناصر من المجموع الخضري وتظهر معظم اعراض نقص العناصر وخاصة البوتاسيوم والماغنسيوم وطبعا الكالسيوم ... ومن اعراضه احتراق حواف الاوراق وتبقع اوراق وعفن الطرف الزهري (معظم المحاصيل الثمرية والدرنية).

** نقص فى معدل البناء الضوئي بسبب تضرر اغشية البلاستيدات الخضراء بسبب درجة الحرارة المنخفضة (للنباتات اللى لا تتحمل الحرارة الباردة والمنزرعة فى الشتاء) ... ودي مشكلة كبيرة للقرعيات (خيار – كنتالوب – كوسة ) وطبعاً الفاصوليا.

** تثبيط النقل – حيث يتوقف النقل للماء والعناصر تماماً فى درجات الحرارة المنخفضة ... زي قصب السكر ومعظم اشجار الفاكهة والزيتون.

** اختلال التنفس وتراكم المواد السامة مثل تراكم نواتج التنفس الهوائي مثل مركب اسيتلادهيد والايثانول بسبب توقف التنفس الهوائي... والتي تدفع النباتات للنضج المبكر على حساب بناء المواد الجافة اللى هتعمل المحصول.